පේරු හි අධ්‍යාපනය සමස්තයක් ලෙස විශ්ලේෂණය කරන විට, එම පද්ධතිය තුළ ගුරුවරුන්ගේ කැපවීමේ සිට ගොඬ නැඟීමට හා ශක්තිමත් කිරීමට තවත් බොහෝ අංග ඇති බව මට පැහැදිලි විය. වෙනත් ආකාරයකට පැවසුවහොත් ගුරු වෘත්තිය යනු හුදෙක් රැකියාවක් පමණක් ම නොව, ඔවුන් තම කාර්යභාරයන් අකුරටම ඉටු කරන්නේ දරුවන්ට ඇති ආදරය නිසාවෙනි.

ළමා මනස,  සෑම දෙයක්ම අවශෝෂණය කර ගන්නා කුඩා ස්පොන්ජ් කැබැල්ලක් වගෙයි.  මේ බව අවබෝධ කර ගත් විට මුල් ළමාවිය ගුරුවරයෙකු වශයෙන්, මා දරුවන්ට උගන්වන විට ආදරයෙන් දැනුම ලබා දීම මූලික කොට සලකමි..

මගේ ජීවිතයේ බොහෝ දේ සිදුවී ඇත, නමුත් මට කිසිදා අමතක නොවන සහ මගේ ජීවිතය සදහටම වෙනස් කළ දෙයක් වූයේ මා පළමු වරට ජර්මන් ගුරුවරියක් ලෙස පේරු හි පෙරපාසලකට සේවයට පැමිණීමයි.  මේ පන්ති කාමරය මා දන්නා අනෙකුත් පාසල්වලට වඩා බොහෝ වෙනස්  බව මා ඒ දොරෙන් ඇතුලු වූ මොහොතේම මට වැටහුණි.  මෙම ළදරු පාසල සමගිය, සාමය සහ ආදරය පිරී ගිය ස්ථානයකි.  තවද, මෙම පාසල මොන්ටිසෝරි අධ්‍යාපන ක්‍රමවේද අනුගමනය කරන ළදරු පාසලක් බැවින් මා නොදන්නා අධ්‍යාපනික මූලධර්ම මෙහිදී භාවිතා වන බව මම හොඳින් නිරීක්ෂණය කළෙමි.

මොන්ටිසෝරි ක්‍රමය විසිවන සියවසේ මුල් භාගයේදී ඉතාලි අධ්‍යාපනඥවරියක් සහ වෛද්‍යවරියක් වන මාරියා මොන්ටිසෝරි විසින් වැඩි දියුණු කරන ලදී.  මෙම ක්‍රමයේදී සංවිධානාත්මක, සෞන්දර්යාත්මක ප්‍රවේශ සහිත, එක් එක් අංගයන් දරුවන්ගේ සංවර්ධනයට උචිත ලෙස දායක වන ආකරයේ සරල සහ ප්‍රබෝධමත් ඉගෙනුම් පරිසරයක් සකස් කිරීම සිදු කළ යුතුය.

මොන්ටිසෝරි ක්‍රමවේදයට අනුකූලව  මාර්ගෝපදේශ සපයමින් දරුවන්ට ලබා දෙන සෑම ක්‍රියාකාරකමක්ම දරුවන් විසින් රස විඳින ආකාරය දැකීමෙන් මම බොහෝ සතුටට පත් වූවෙමි.  වයස අවුරුදු 2ක් හෝ 4ක් වැනි කුඩා දරුවන්ගේ පෞද්ගලික ස්වාධිපත්‍යය දැකීමෙන් මට මහත් තෘප්තියක් දැනුණා.

එදා මට දැනුනේ මගේ හදවතට තවත් හැඟීම් දරාගත නොහැකි බවයි. “ජියානිනා, ඔබ ඔබේ ජීවිතයේ සොයමින් සිටි දේ ඔබට හමුවුණා.” ඒ මොහොතේ මම මටම මුමුණා ගතිමි. මම මගේ ජිවීතයේ සැබෑ සතුට සොයා ගනිද්දී මගේ කම්මුල් දිගේ සතුටු කඳුළු ගලා යන බව මට දැනුණා.

ඉගෙනීම් දුබලතා ඇති දරුවන්ට මෙන්ම මගේ රටේ සෑම දරුවෙකුටම මඟ පෙන්විය හැකි මෙවලමක් මා සොයාගෙන ඇති බව මම දැන සිටියෙමි.  පේරු හි වෙසෙන සියළුම දරුවන්ට මඟ පෙන්වීම ඇත්තෙන්ම මගේ ආශාවයි.

මා හට මෙම පෙරපාසල තුළින් මෙවැනි ආශ්චර්යමත් ලෝකයට පිවිසීමට  ඉඩ සැලසීම සම්බන්ධයෙන් එම ළදරු පාසලේ අධ්‍යක්ෂක, ආදරණීය ටැන්ටේ ජැනට් වෙත මම සැමවිටම කෘතඥ පූර්වක වෙමි.  එදා සිට අද දක්වා වසර හතක කාලයක් ගත වී ඇතත්, මම මගේ ඉගෙනීම සහ ගවේෂණය නතර නොකළෙමි; එසේ කිරීමට මට අවැසි වූයේද නැත.

2019 වසරේදී, ජාත්‍යන්තර මොන්ටිසෝරි සංගමය (AMI) පේරු හි මොන්ටිසෝරි සංගමය (MAP) ලෙස පේරු රාජ්‍යයේත් ක්‍රියාත්මක වන බව ඇසීමෙන් මම ඉමහත් සතුටට පත් වුණෙමි.

අද වන විට මම AMI සහතිකපත් ලාභී පෙරපාසල් උපදේශිකාවක් වන අතර ආදරයේ උරුමයක් වන ආචාර්ය මාරියා මොන්ටිසෝරිගේ මුල් ළමාවිය අධ්‍යාපනික ක්‍රියාපිළිවෙත දිගින් දිගටම කරගෙන යාමට හැකිවීම ගැන මම සතුටු වන බව ඉමහත් අභිමානයෙන් ප්‍රකාශ කරමි.  මගේ පරමාර්ථය වන්නේ පේරු හි සෑම තැනකටම මෙම විශ්මයජනක මොන්ටිසෝරි ක්‍රමවේදය ව්‍යාප්ත කිරීමයි.

මාරියා මොන්ටිසෝරි පවසන්නේ “දරුවන් තුළ හොඳ අදහස් වපුරන්න, ඔවුන් ඒවා තේරුම් නොගත්තත්; කලාය ගෙවෙද්දී ඔවුන්ගේම අවබෝධයෙන් ඒවා තේරුම් ගැනීමට දරුවන්ට හැකි වන බවයි"

මම මගේ ජීවිතයේ මෙම මාර්ගය අනුගමනය කරන්නෙමි, දෙවියන්ගේ මෙන්ම මාරියා මොන්ටිසෝරි මහත්මියගේ දර්ශන මගේ හදවතේ ගැඹුරින් තැන්පත් වී ඇත. ධනාත්මක ආකල්ප වැපිරීම මම දිගටම කරගෙන යන්නෙමි, එවිට ඒවා එකිනෙක ඵල දරන විට මට දෑස් පූරා ඒ මිහිරියාව රසවිඳිය හැකියි.

දරුවන් වැඩෙන බව දැකීම මට සතුටට කරුණක්.

මම ජීවිතයට ආදරෙයි;  මම ජීවත් වෙන්නේ සතුටින්!